KESHILLA
Për një intervistë të suksesshme

Këshilla të përgjithshme

Përpara intervistës mundohuni të mblidhni sa më shumë informacion rreth kompanisë ku po aplikoni.Për këtë mund të shfrytëzoni raporte të publikuara, broshura, Internetin etj. Lexojeni me sy kritik aplikimin tuaj dhe mendoni rreth karrieres tuaj profesionale si dhe pyetjeve të cilat mund ti hasni gjatë intervistës.

Për t'ia dalë mbanë në intervistë, duhet të krijoni bindjen se ju jeni teknikisht të kualifikuar për këtë pune, se ju jeni shumë të motivuar dhe se mund të përshtateni mirë me strukturën organizative te kompanise si dhe me stafin e saj.

Mos harroni ti kushtoni vëmëndje edhe veshjes suaj, e cila duhet të jetë e përshtatshme për një intervistë pune (serioze, elegante, e thjeshtë etj). Përpiquni të jeni korrekt në kohë, dilni nga shtëpia më herët se zakonisht për të evituar vonesat nga trafiku, të papriturat, etj. Gjatë intervistës mundohuni që të jeni sa më pozitiv rreth vetes si dhe aftësive tuaja në punë, por mos e teproni më shumë seç duhet.

Pse e dëshironi këtë punë?

Mendohuni mirë rreth kësaj pyetjeje. Shpjegoni aspektet pozitive që ju kanë tërhequr për të aplikuar në këtë vënd pune. Mos përmendni aspektet negative që keni hasur në punën e mëparshme ose që mund të gjeni këtu.

Çfarë cilësish mendoni se kërkon kjo punë?

Publikimi që keni parë për pozicionin që po aplikoni mund t'u ndihmojë paraprakisht, por ju duhet të mendoni gjithashtu edhe për cilësi apo aftësi të tjera të kërkuara. Këtu mund të përfshihen aftësitë drejtuese, të komunikimit, aftësi analitike, personale etj.

C'farë kontributi do të sillnit ju në kompaninë tonë?

Kjo pyetje ju jep mundësine ku ju të "shkelqeni". Tregoni rreth aftësive tuaja profesionale, përmendni arritjet tuaja të mëparshme vecanerisht ato që kanë lidhje me pozicionin e ri qe po aplikoni. Theksoni se si do ti aplikonit ju aftesite dhe njohurite tuaja profesionale për të arritur objektivat e kompanisë.

Pse dëshironi të punoni për këtë kompani?

Përqëndrohuni në aspektet pozitive për të cilat ju doni të bëheni pjesë e kompanisë si reputacionin e kompanisë, mundesinë për zhvillim të mëtejshëm profesional, atmosferën miqësore të punës etj, dhe evitoni aspektet të tilla si: rroga më e mire më pak orë pune. Një përgjigje e tille mund të krijoj një përshtypje të gabuar rreth jush dhe nuk do ti pëlqente shumë punëdhënësit.

Çfarë dini rreth kësaj kompanie?

Kjo eshte mundësia juaj për ti bërë përshtypje intervistuesit me njohuritë tuaja rreth kompanisë. Mund te flisni rreth produkteve/shërbimeve, klientëve, misionin apo qëllimet e kompanisë, etj.

Çfarë mund t'iu ofrojmë ne, në krahasim me punëdhënësin e mëparshëm?

Bëni kujdes këtu! Mos përmëndni çështje parash apo eksperienca negative qe mund te keni hasur në punën e mëparshme. Theksoni më tepër mundësinë për zhvillim personal, sfida të reja, etj.

Pyetje që mund ti bëni intervistuesit

Intervista është një proçes i dyanshëm. Jo vetëm kompania intervistuese kërkon të mësojë më tepër rreth jush, por edhe ju keni nevojë të dini më shumë rreth pozicionit të ofruar dhe kompanisë. Kjo ju ndihmon për të kuptuar se sa mund ti përshtateni ju pergjegjësive të detyrës, ambjentit të kompanisë etj Sigurohuni të keni marrë informacion të mjaftueshëm për të qartësuar mëndjen tuaj. Ka një sërë pyetjesh që mund të bëhen:

• Cilat do të jenë përgjegjësitë e mia?
• Ku do të pozicionohem në strukturën organizative?
• Kujt do ti raportoj?
• Çfarë prisni prej meje në këto 6 muajt e parë?
• Cilët janë kliente tuaj?
• Cilat janë qëllimet e kompanisë? Objektivat e së ardhmes?
• Cilat janë mundësitë për të avancuar/ngritur në detyrë në këtë vënd pune?
• Cila do të jetë paga ime, përfitimet, bonuset? (mos i bëni shumë herët këto lloj pyetjesh gjatë intervistës, prisni deri sa t’ju krijohet momenti i duhur)
• A do të me duhet te udhëtoj jashtë qytetit/vendit  në këtë pozicion?
• A parashikohet ndonjë  transferim tani apo në të ardhmen?
• A ofrohen trainime për zhvillim të mëtejshëm profesional?•  Kur mund te merrni nje vendim?
• Cili është hapi tjetër? A do të më kontaktoj dikush nga zyra juaj për të më njoftuar për vendimin tuaj?

Paneli i inervistës

Shumë njerëz i kanë "bezdi" këto lloj intervistash dhe i cilësojnë ato si një lloj testi. Për të dalë të suksesshëm, ju duhet të identifikoni figurat e panelit intervistues si dhe rolet e tyre. Personi kryesor është i lehtë për tu dalluar pasi zakonisht ai/ajo bën prezantimin fillestar. Ju duhet të identifikoni gjthashtu edhe personin i cili mund të punojë direkt me ju.

Gjatë intervistës, mos harroni se jeni duke folur me disa persona dhe nuk duhet ti referoheni vetëm atyre të cilët po ju drejtojnë pyetjen. Ruani vazhdimisht kontaktin me sy me të gjithë pjestarët.

Faktorët që mund të pengojnë suksesin e intervistës

• Të qënit i papregatitur për intervistën. (mblidhni sa më shumë informacion rreth aftësive tuajadhe kompanisë dhe mundohuni të ndiheni sa më rehat gjatë intervistës)
• Dhënia e dorës shumë e shtrënguar ose fare e butë
• Rrëfimi i gjërave jo të favorshme në lidhje me punëdhënësin e mëparshëm.  Punëdhënësi do të mendojë se çfarë mund të thoni ju rreth tyre kur të largoheni nga kjo punë.
• Komunikimi jo i qartë dhe efektiv.
• Të tregoheni agresiv apo superior, askush nuk do ta pëlqente këtë.
• Të kërkoni të falur për të metat / mangësitë tuaja.

Udhëzimet për suksesin e intervistës nuk mbarojnë këtu. Ka plot gjëra të tjera për të mësuar e që do ti lexonin në artikujt e ardhshëm.